Нохьан кема

Но̄хьан ке̄ма, Нохьан хинке̄ма, Нӯхьан хӀордке̄ма (Ӏаьр. سَفِينَةُ نُوحٍ‎‎, Сафӣнату Нухь; Ӏеб. תֵּבַת נֹח‎, тева̄т Hо̄axь; схьадаьлла Ӏеб. תֵּבָה‎-х, тева̄ — «гӀутакх, тӀорказ, кема») — Къуръано а, Библино а ма-бохху, иза кема ду, Нохь пайхамаро Делан омранца шен доьзал а, ийман диллинарш а, массо а дийнаташ а Дерригдуьненан хитІедаларх кӀелхьардаха дина долу.

«Нохьан кема». Сурт диллинарг Эдвард Хикс ву, 1846 шо.

«Нохь пайхамаран кема дар». Вевзаш воцчу французийн суртдиллархочо диллина сурт, 1675 шо.

И тайпа кема хьахийна ду масех ширачу туьйранашкахь, царах ду шумарийн/аккадийн хитӀедаларан туьйра, цу тӀехь хьахийна хилла Нухь пайхамаран хитӀедаларан дийцарх тера дийцар.

ХитӀедаларан дийцарш

Сумерийн хитӀедаларан дийцар

ДӀадаханчу бӀешеран чаккхенга кхаччалц, нах тешаш хилла Товрат ХитӀедаларан дийцаран уггаре а шира хьоста ду аьлла, амма 1853-чу шарахь цӀеххьана карийна хилла Бабилан хитӀедаларан дийцаран копи. Ткъа 1889—1900-чу шерашкахь Ӏиракъехь ахкарш дечу хенахь, дуьххьарлерчу америкин археологин миссина карийна хилла Ниппур-гӀалахь Сумерийн хитӀедаларан дийцар тӀехь долу поппаран экъа (у). Цул тӀаьхьа кхиберш а цунна тӀаьхьабевлла. Ткъа сумерийн дийцар йаздинчу йозанан таммагӀах (лар) гуш ду, иза гергарчу хьесапехь, гӀараваьллачу Бабилан паччахьан «Хьаммурабин» заманера хилар, шеко йоцуш иза цул хьалха хилла хилар а.