Асхьабаш
Сахьа́би (Ӏаьр. الصَّحَابِيّ), дукхаллин терахь асхьа́баш (Ӏаьр. الأصحاب), йа сахьа́баш (Ӏаьр. الصحابة) — иза исламан термин йу хӀор Мухьаммад пайхамаран ﷺ дуьхьал а кхетта, цуьнга иман а диллина, ислам динехь а волуш дӀакхелхинчунна лелош. Иштта асхьабех бу дуьххьара исламан элчаналла дӀадаьхьнарш а, Мухьаммад пайхамаран ﷺ ансараш а, цунна гӀо дина болу, цуьнца накъосталла а лелийна, цуьнца иман а диллина, цу тӀехь дӀакхелхинарш а бу[1]. Асхьабаш Мухьаммад пайхамаран ﷺ дахаран дукхах долчу декъехь цуьнца цхьаьна хилла бу, ислам дине кхайкхам бина чул тӀаьхьа. Исламан элчаналла дӀакхачош цара гӀо а дина цунна, масийттаза иза кӀелхьара а ваьккхина. Мухьаммад ﷺ дӀакхелхина чул тӀаьхьа, асхьабаша халифат тӀелецира, «нийсачу новкъахь болчу халифийн зама» олуш йевзачу заманахь. ТӀаккха уьш шахьаршкахь дӀасабаьржира исламан Ӏилманаш а, жихӀад а даржо, иштта гӀаланаш а, пачхьалкхаш а схьайаккхархьама. Асхьабаш куьйгалла дина дуккха а исламан тӀемашкахь: Шемахь а, Мисарахь а, Персойн махкахь а, Хорасанехь а, ХӀиндехь а, МаварааннахӀр-махкахь а.
Асхьабаш | |
---|---|
Сийнан суффикс | Дела реза хийла царна[d] |
Цуьнан рогӀераниг | табиӀинаш[d] |
Медиафайлаш Викилармехь |
Жайнаш а, законаш а
|
Къастам нисйе бӀаьра
Терминан къастам усулхошна а, мухьаддисашна а гергахь тайп-тайнапара бу Мухьаммад пайхамаран ﷺ сахьаби хила мел хан йеза аьлла. Усулхошна гергахь сахьабин къастам: «Мухьаммадна ﷺ дуьхьал а кхетта, цуьнга иман а диллина, цуьнца дукха йеха зама йаьккхинарг ву». Ткъа мухьаддисашна гергахь: «Бусалба волуш цунна ﷺ дуьхьал мел кхеттарг ву, шен ислам дин тӀехь дӀа а кхелхина, цуьнца сухьбаталла (сахьабалла) дахделлехь а, йа ца деллехь а».